Հայաստանի գրախանութներում սիրով գնորդների ուշադրությանն են ներկայացնում ռուսական հրատարակչությամբ մի աշխարհագրական հանրագիտարան, որտեղ Հայաստանին նվիրված էջը կսարսափեցնի և հունից կհանի ցանկացած հայի:
Բանն այն է, որ հանրագիտարանում Հայաստանը ներկայացվում է տրամաբանության բոլոր սահմաններից դուրս գտնվող փաստերով` նախ, որ Հայաստանում հիմնական լեզուն, բացի հայերենից, նաև ադրբեջաներենն է, Հայաստանի հիմնական կրոններն են ողղափառությունը և իսլամը` մասնավորապես շիա ուղղությունը, ինչպես նաև ստահոդ տեղեկություններ` կապված Արցախի հարցի հետ:
Մասնավորապես նշվում է, թե 1988-89 թվականներին Հայաստանի և Ադրբեջանի միջև տեղի է ունեցել պատերազմ` Արցախի կարգավիճակի պատճառով, որտեղ Արցախը ներկայացվում է հետևյալ կերպ` «Ադրբեջանի պատմական տարածք` մեծամասամբ հայերով բնակեցված»:
«Большая иллюстрированная энциклопедия географии» ` կոչվող մոտ տասը հազար դրամ արժողությամբ հանրագիտարանը լույս է տեսել 2009 թվականին` ռուսական «Махаон» հրատարակչության կողմից` բրիտանական «The kingfisher geography encyclopedia» ընկերության հետ համագործակցության շրջանակներում:
Հանրագիտարանում զավեշտալի և զայրացուցիչ է նաև Հայաստանը ներկայացնող լուսանկարը. դաշտում կարտոֆիլ հավաքող երկու գյուղացի` տարեց կին ու տղամարդ, որոնց կերպարանքն ավելի շատ ադրբեջանցու հետ կարելի է ասոցացնել, քան հայի:
Մի խոսքով, Հայաստանի ու հայերի մասին տեղեկություն ստանալ ցանկացող արտասահմանցին, այս հանրագիտարանը դիտելով, կարող է միայն եզրակացնել, որ Հայաստանը մուսուլմանական հետամնաց մի երկիր է` հիմնականում գյուղատնտեսությամբ զբաղվող հետամնաց բնակչությամբ:
« Մ՞իթե Հայաստանը ներկայացնելու համար ավելի հարմար լուսանկար չեն գտել` Գառնին, Էջմիածինը կամ հազարավոր պատմամշակութային կողոթներից որևէ մեկը,-տեսնելով հանրագիտարանը`զարմացած հարցնում է մի երիտասարդ,-մենք քաղաքակիրթ ազգ ենք, և միայն կարտոֆիլ աճեցնելով չենք ապրում: Էլ չեմ ասում կրոնի ու լեզվի մասին: Կարծում եմ, սա հատուկ մշակված քաղաքականություն է, որպեսզի վարկաբեկվի Հայաստանը»:
Նշենք, որ հանրագիտարանում Հայաստանի մասին զետեղված ոչ հավաստի փաստերի մասին տեղեկացանք «Կենտրոն» հեռուստաընկերության
«Բարի լույս» հայեր հաղորդաշարի ընթացքում հնչած մի քաղաքացու զանգից:
Կինը զայրույթով պատմում էր, թե ինչպես է գնել այդ հանրագիտարանը և բացելով Հայաստանին վերաբերող հատվածը, բացահայտել կեղծ ու ոչ հավաստի տեղեկություններ:
Նա նաև խնդրեց հաղորդավարներին` այդ հարցը բարձրացնել «վերևներում»: Հաղորդավարները խոստացան խնդրով զբաղվել` ասելով, որ նախ տեղյակ կպահեն լրագրողներին` կնոջը զգուշացնելով, որ օպերատորների մոտ թողնի իր հեռախոսահամարը:
Անմիջապես հետաքրքրվեցինք բարձրացված հարցով և որոշեցինք գնալ հանրագիտարանի հետքերով և հոդված պատրաստել: Զանգահարեցինք «Կենտրոն» հեռուստաընկերություն` վերցնելու զանգահարող կնոջ հեռախոսահամարը (քանի որ հեռախոսազրույցից հստակ պարզ չդարձավ հանրագիտարանի անվանումը, հրատարակման թիվը և այլն):
Հաղորդաշարի կոորդինատորը հայտնեց, որ իրենք չեն գրանցել կնոջ հեռախոսահամարը`ինչ որ անիմաստ ու անորոշ պատճառաբանություններ բերելով:
Ինչևէ , մեզ մնում էր այցելել մայրաքաղաքի բոլոր գրախանութները, «քրքրել» ռուսալեզու բոլոր աշխարհագրական հանրագիտարանները և գտնել այդ հանրագիտարանը:
Բարեբախտաբար, մեր ջանքերն ապարդյուն չանցան: Մաշտոցի պողոտայի հայտնի գրախանութներից մեկում հանրագիտարանը հայտնաբերվեց: Գրախանութի աշխատողներն ասացին, որ մի քանի ամիս է, ինչ այն ստացել են, սակայն դժվարացան ասել, թե արդեն որքան է վաճառվել: Նրանք նաև ասացին, որ հանրագիտարանի վերաբերյալ դեռևս բացասական արձագանքներ չեն ստացել:
«Անկախ»ը հետամուտ կլինի այս հարցի բարձրացմանը պետական ու հասարակական շրջանակներում` հարկ եղած դեպքում նաև դատի տալով հանրագիտարանը հրատարակած ռուսական ու բրիտանական հրատարակչություններին:
www.ankakh.com
.
Այս շարքից․
«Նոյյան տապանը» հանրագիտարանը կվաճառի «վրիպակների և սխալների ներդիրով»
«Անկախ»-ը դատական գործընթաց է սկսել ռուսական ու բրիտանական հրատարակչությունների դեմ
Հայերեն