Հայոց Ցեղասպանության օրինագիծը Հայաստանում. Ո՞ւմ համար է այն

Հայոց Ցեղասպանության օրինագիծը Հայաստանում. Ո՞ւմ համար է այն

Նոր Յառաջ (Փարիզ),

13.11.2009

Դաշնակցությունն Ազգային Ժողովին Ցեղասպանության հետ կապված օրինագիծ է առաջարկել:

Ըստ ՀՅԴ-ի, Քրեական օրենսգրքում պետք է կատարել փոփոխություններ և ամրագրել, որ «Օսմանյան Թուրքիայում և Արևմտյան Հայաստանում իրագործված Հայոց ցեղասպանությունը հերքելը, մեղմացնելը, հավանություն տալը, արդարացնելը կամ ուրանալը պատժվում է տուգանքով կամ 3-5 տարվա ազատազրկմամբ»:

Հայաստանի Քրեական օրենսգիրքը Ցեղասպանության հերքման պատասխանատվության դրույթ ունի: ՀՅԴ-ն, սակայն, ցանկանում է, որ Հայոց Ցեղասպանության հանդեպ հատուկ մոտեցում լինի:

Դաշնակցության խմբակցության քարտուղար, ԱԺ պատգամավոր Հրայր Կարապետյանը այս կապակցությամբ լրագրողներին ասել է. «Դուք գիտեք, ցեղասպանության հետ կապված մենք օրենսդրական նախագիծ ենք դրել շրջանառության մեջ: Մենք առաջինը չենք, ի դեպ, այս հարցում Եվրոպական որոշ երկրներ արդեն ընդունել են այս օրենքը: Ովքեր ցեղասպանության խնդիրը կասկածի տակ կդնեն, կամ կհերքեն, պետք է ուղակիորեն քրեական պատասխանատվության ենթարկվեն»:

ՀՅԴ խորհրդարանական խմբակցության անդամ Արծվիկ Մինասյանը «Ազատություն» ռադիոկայանի հետ զրույցում նշել է, որ օրինագծի ընդունման դեպքում քրեական պատասխանատվություն է սահմանվում ոչ միայն ՀՀ քաղաքացիների, այլև օտարերկրացիների համար:

Խորհրդարանում «Ժառանգություն» կուսակցության խմբակցությունը ողջունել է ՀՅԴ-ի այս նախաձեռնությունը:

Հայաստանում նման օրինագծի անհրաժեշտությունը տեսնում է նաև «Արարատ» ռազմավարագիտական կենտրոնի տնօրեն Արմեն Այվազյանը: Նա մեզ հետ զրույցի ընթացքում ասաց. «Օրենք իհարկե պետք է: Եվ միջազգային պրակտիկան դա հուշում է: Իսրայելն էլ ունի այդպիսի օրենք»:

Նման օրինագծի ընդունման անհրաժեշտությունն Արմեն Այվազյանը հիմնավորում է նրանով, որ ըստ նրա, ցավոք, այսօր Հայաստանում կան մարդիկ, ովքեր հերքում են ցեղասպանությունը:

Սեպտեմբերի 17-ին Արմեն Այվազյանի «Արարատ» ռազմավարագիտական կենտրոնը դատի է տվել «Կովկասյան ինստիտուտ» հիմնադրամին: Պատճառն այն է, որ Հիմնադրամը հրապարակել է մի ժողովածու, որտեղ զետեղված է եղել թուրք փորձագետի հոդվածը: Այստեղ հերքվել է Ցեղասպանությունը և բառը դրվել է չակերտների մեջ:

Դատավարության առաջին նիստը տեղի կունենա դեկտեմբերի 3-ին: Արմեն Այվազյանը մեզ խոսոտվանեց, որ իրենք հաղթանակ են ակնկալում:

«Կովկասյան ինստիտուտ» հիմնադրամի տնօրեն Ալեքսանդր Իսկանդարյանն, ում դեմ ուղղված է դատական հայցը, մեզ հետ զրույցում ասաց, որ ինքը չի հերքում Ցեղասպանությունը:

«Ըստ իս, դա ընդհանրապես տարօրինակ մոտեցում է: Ես գիտնական եմ, ես Ցեղասպանությանը վերաբերվում եմ որպես ինչ-որ փաստի: Անկախ բարոյական դիրքորոշումից, Ցեղասպանությունը հերքելն ինձ բավականին հիմար բան է թվում: Դա նույնն է, ինչ հերքես լուսնի, Աֆրիկայի եղելությունը: Ոչ, ես չեմ հերքում Ցեղասպանությունը»:

Ինչ վերաբերվում է նշված գրքին, Ալեքսանդր Իսկանդարյանի խոսքերով, այն կոնֆերանսի արդյունք էր, որը ֆինանսավորվել է Միացյալ Ազգերի Կազմակերպության կողմից:

Կոնֆերանսին մասնակցել են փորձագետներ Հայաստանից, Վրատսանից, Ադրբեջանից, Աբխազիայից, Հարավային Օսիայից , Լեռնային Ղարաբաղից և Թուրքիայից: Նրանց հոդվածներն էլ զետեղվել էին այդ գրքում: Թուրք ներկայացուցիչն իր հոդվածում վերցրել է «ցեղասպանություն» բառը չակերտների մեջ, քանի որ Թուրքիայում նման դեպքերի համար համապատասխան քրեական օրենք կա:

Այս հոդվածի մասին ասուլիսի ընթացքում Արմեն Այվազյանն ասել էր. «Այսօր մենք նշեցինք միայն Ցեղասպանության ժխտման փաստը, բայց Գյորգյուլույի (հեղինակի) հոդվածում կա մի այսպիսի պնդում, որ մինչև 1991 թվականի սեպտեմբերը, Հայաստանը երբեք պետականություն չի ունեցել: Եվ պարոն Ալեքսանդր Իսկանդարյանը հանդիսանում է այս գրքի խմբագիրը»:

«Ես Հայաստանում գիտեմ երևի հարյուրավոր պատմական աշխատանքներ, որտեղ մեջբերվում են օրինակ Թալեաթ Փաշայի խոսքերը, և առաջնորդվելով այս տրամաբանությամբ այս հոդվածաշարերի հեղինակներին պետք է միանգամից դատել»,-ասաց Ալեքսանդր Իսկանդարյանը:

«Կովկասի Ինստիտուտի» տնօրենի կարծիքով իրականում այստեղ կարևորն այն է, որ հայ-թուրքական հարաբերություններն ու Ցեղասպանության հարցը հայերի համար ընդհանրապես զգայուն թեմաներ են: Առավել ևս հիմա, երբ ի հայտ են եկել արձանագրությունների հետ կապված այս պատմությունները: Նրա կարծիքով, իզուր չէ, որ այս դատական գործը հիմա է առաջ քաշվել, չնայած որ գիրքը վաղուց է տպագրվել:

Ալեքսանդր Իսկանդարյանի կարծիքով Հայաստանում Ցեղասպանության մասին օրենքի ընդունումն անիմաստ կլինի:

«Չեմ կարծում, որ պետք է մի օրենք, որը ինձ կարգելի ժխտել երկրի ձգողական ուժի օրենքը: Եթե ինձ մոտ կգա ինչ-որ մարդ և կհերքի երկրի ձգողական ուժը, դե ես նրան կխղճամ»,-ասաց «Կովկասյան ինստիտուտի» տնօրենը:

Լիանա Խաչատրյան